Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

martes, 27 de noviembre de 2012

Picu Cugullu o San Xustu



    Domingo, 25 de payares de 2012          Altu La Mozqueta - Campa d'Urbiés - Campa Les Abeyes - Picu Cugullu o San Xustu - Altu La Mozqueta

    Como dicía na entrada "Tres Conceyos: Mieres, Samartín y Llaviana" esti añu propúnxime correxir l'error de dir dexando pa dempués lo que ta cerca, lo fácil.
    A vegades, esi dempués nunca llega y nun mos damos cuenta qu'al llau tenemos coses tan prestoses o más que les que tan lloñe.
    Nos últimos meses pisé por primera vez, espero que nun sea la última, pequeñes cumes que me prestaron tanto como otres de munchu más prestixu montañeru.
    Llosoriu, Magarrón, cordal de Qués, Tres Conceyos (Samartín), Escobín y Cugullu son por esti orden los mios "descubrimientos" de la última temporada.
    Ye verdá que nun foron grandes caminates pero si prestoses y amás proyectos d'escursiones más llargues.
    Tengo na mente sitios que casi me da vergoña nun conocer: Polio, Cuetu Ventosu, Grandamiana, La Degollada, Santu Mederu, Llan de Cubel...Espero dir descubriéndolos pasu entre pasu.

    El domingu, 25/11/2012 subí al techu Llangréu, el picu Cugul.lu o San Xustu.
    Nun tien dificultá nenguna. Dexé'l coche nel altu La Mozqueta y per una pista casi llana y con direción noroeste, pasando pela campa Urbiés enseguida se ve la puntiaguda cume del Cugul.lu.
    Empecé a crestear hasta llegar al picu. Pémeque nun ye bona idea porque hai artos y cotolles abondo. Pero'l mio destín debe ser convertir lo fácil en difícil y esta vez nun tenía que ser menos.
    La vuelta fíxila pela pista siguiendo cumeando un bon trechu p'agarrala.
    Prestóme pola vida lo que se ve dende la cume y casi más tovía lo que punxeron ellí.
    Hai bones vistes pa los valles de Samuño y de Turón coles sos viesques y pueblinos. Lo colores la seronda tovía nun desapaicieron y yá sabemos qu'eso ye un añadíu especial. Siguiendo'l cordal d'Urbiés vemos pal norte el picu Polio, al sur el Tres Conceyos y más lloñe Peña Mea.
    El día nun yera de muncha visibilidá pero adivínense Les Ubiñes pa un llau y Peñamayor pal otru.
    Pienso que nos díes claros podrán vese otros munchos montes.
     Comentariu aparte merez lo que podemos ver na cume. Xunto al clásicu buzón, hai un cascu mineru y a unos metros el castillete d'una mina.
    Siempre m'emociona tola simboloxía rellacionada colos mineros y esta vez nun diba ser una escepción.
     A la vuelta, pela pista, xusto debaxo'l picu vese'l pueblín de San Xustu.

     Nun me resisto a poner la lleenda que'l ex-mineru y fotógrafu José Luis Soto García diz que cuenten los más vieyos del llugar:

    “Cunta la llenda que venien estos santos fuxendo de los Romanos montaos nuna mula blanca y nel sitiu que guei conocese comu La Patatera, la mula dio una patá nuna penasca, dexando marcá la ferraura al revés y engañando asina a sos perseguiores.
En S. Xusto puiblu amarraron la mula onde los caños, nisti sitiu, había una piedra que traia escrito “Cuandu Dios quería equi augua había”. Entos la mula dio otra patá y torno a surdir augua.
S. Xusto tamien fue poblao por xente que yera disprecia, (de la mesma prosapia que Les Duernes). Asitiaron dos pareyes nel puiblu. Los de S. Xusto cunten que fixieron cabanes de piornos y tapinos, semaron miyo (cereal), mercaron delles cabres y asina foron medrando. Cuandu allegaron los santinos Xusto y Pastor fuxendo, ellos foron los que los escondieron nueve dies, hasta que los perseguiores los descubrieron”.


José Luis Soto, San Xusto, marzo 2011

     Dempués, pela campa Les Abeyes y la campa Urbiés, vamos viendo'l pueblu que lleva esi nome y tol valle Turón  hasta llegar al Altu La Mozqueta.
     En resume, una guapa patiada.

lunes, 26 de noviembre de 2012

L'Escobín o Picayu

        Sábadu, 24 de payares de 2012       Olloniegu, La Mortera, Escobadielles, Escobín, valle a antigües mines, Servanda, Olloniegu.

sábado, 24 de noviembre de 2012

Nun canso de patiar per Peñamayor

         Sábadu, 15 de setiembre de 2012               Les Praeres, Anés, Breza y Trigueru,Campagüés, Fayacava, Les Praeres.

         Otru día más y van...di un paséu per Peñamayor.
         El recorríu foi'l de casi siempre: Les Praeres, Ortigosa, Espines, el Covayu, Anés, Breza, Trigueru, crestéu pela Goleta, Campagüés, Fayacava, Les Praeres.

jueves, 22 de noviembre de 2012

El Retriñón y per tierres ayeranes


 
Martes, 17 de xunetu y martes, 11 de setiembre de 2012
El Retriñón y dalgunes foces ayeranes

lunes, 19 de noviembre de 2012

Alredor de Peñamayor

Domingu, 18 de payares de 2012
Pra-Campanal-L'Artosa-Picu Castiellu-La Campa-Les Praeres-Pra

       Tocaba moyase y asina foi. La seronda ye pa min la estación más guapa del añu.

domingo, 18 de noviembre de 2012

A orielles del Nalón

Martes, 25 de setiembre de 2012

Soto Ribera - Olloniegu - Bárcena - Soto Ribera


       Lo que diba ser un día de patiar y retratar pel monte, convirtióse nuna  xornada más de lo segundo que de lo primero.

jueves, 15 de noviembre de 2012

L'otru Narancu



Miércoles, 14 de payares de 2012 

Uviéu - Narancu - Uviéu   

          Muncha xente conoz El Narancu polos monumentos o pol ciclismu. La verdá ye que, yo que llevo años patiándolu, pueo dicir que ye dalgo más.

martes, 13 de noviembre de 2012

Per Peñamayor

               Sábadu, 22 de setiembre de 2012

       Les Praeres, Breza, Los Caspios, cordal del Arrudu, riu Muriosa, La Focella, El Felguerón, La Llama, Les Praeres.

domingo, 11 de noviembre de 2012

Foces del Pendón d'otra manera

 Foces del Pendón 

 (Pra - Bocarral - H.uensanta - Foces del Pendón - Mayáu Pastor - La Varallonga - Pra)

   Domingu, 4 de payares de 2012

        Pa min, Pra ye un sitiu estratéxicu pa empezar rutes.

viernes, 9 de noviembre de 2012

Peñamayor (agua y borrina na seronda)

Peñamayor                   Sábadu, 3 de payares de 2012


      Hebo años que diba a patiar una o dos veces a la selmana per esti monte.

miércoles, 7 de noviembre de 2012

Peña Salón

Peña Salón      Sábadu, 20 d'ochobre de 2012

Dexé'l coche poco antes de Puente Agüera y subí pela Foz de los Andamios y carreterina a Casielles.

Tres Conceyos: Mieres, Samartín y Llaviana


Domingu, 28 d'ochobre de 2012

Un Tres Conceyos

       Lo del títulu de la entrada vien a cuentu porque polo menos hai otru picu n'Asturies col mesmu nome.
Ye onde se xunten otros tres conceyos: L.lena, Ayer y Villamanín.    
      Anque nun lleven esi nome viénenme a la cabeza polo menos otros dos: Burra Blanca y el picu l'Ará. El primeru ye'l monte que comparten Mieres. Llaviana y Ayer. Ta un pocu más al sur, nesti mesmu cordal. El segundu ye onde se xunten Sieru, Nava y Bimenes. De xuru qu'hai más.
       Esti modestu picu ye de los que yo siempre fui dexando porque ta cerca o porque ye un momentu dir y acabes sin patialu.
       Como esti añu propúnxime correxir estos errores, el pasáu domingu, 28 d'ochobre ariméme a elli.
       Ye verdá que la mio caminata foi bien corta polo que tendré que repetila y andar un poquiñin más per esti prestosu cordal.
       El camín que fixi empieza nel altu La Colladiella y per una pista con dirección sur un poco pindia a lo primero pero enseguidina casi llana arrodia pel oeste el picu Tres Conceyos y llega a Campa Cimera na base'l monte.
       Aquí hai dos paneles panorámicos semicirculares que sitúen nel horizonte pueblos y picos. Merez la pena parase a miralos porque presta asgaya la infomación que te dan. Amás ye un anticipu de lo que vamos ver dende la cume. 
       Per un senderu bien marcáu, en pocu tiempu subimos los escasos cien metros de desnivel que mos falten.
       Total una hora escasa contando les paraes que non fueron pequeñes. La panorámica ye alloriante, eso que'l día nun ayudaba pero asina y too...
       Llamóme l'atención un buzón de cume más grande que davezu con una llibretina y unos bolis pa que caún dexe les sos impresiones. Tamién hai una rosa de los vientos colos nomes de los sitios de la rodiada. (Nun soi partidariu de llenar los picos de chatarra pero como a otres coses,los belenes por exemplu, naide-yos pon impedimentu, pémeque esto sería bastante más útil).
       Baxé pel llau contrariu a la subida per una sienda desdibuxada peles cotolles y felechos.

       Monumentu al Mineru y a La Paz y La Memoria 

       Nel principiu y fin de la sienda hai dos monumentos que pola so situación y el so tamañu nun pasen desapercibíos y paga la pena velos.
      El monumentu al Mineru, nel picu l'Arquera, ta fechu pol artesanu del metal Diego Dorado, que ye natural de Turón. Son dos mineros abrazaos representando la unión y la solidaridá ante les traxedies o inxusticies que siempre los distinguió.
       Na parte baxo'l monumentu, un recintu zarráu y bastante abandonáu, representa un taller d'una mina cola so maquinaria. El monumentu a los Guerrilleros antifranquistas o a La Paz y la Memoria ta dedicáu a los que llucharon pola la paz, la llibertá y por un mundu más humanu y más xustu.

lunes, 5 de noviembre de 2012

Asiegu – Peña Blanca ( de mentira)

Cabrales (y Llanes). Miércoles, 24 d'ochobre de 2012


        Esta ye una caminata perguapa y sin grandes dificultaes. Salí de la parte arriba del pueblu
y per una pista mui pindia a lo primero y más llevadera depués llégase hasta’l guapu mayáu de Tebrandi.        
        D’aquí p’alantre, pasando pel corralón del Caxigu y  per una sienda que nun tien perda, llégase al colláu Virzu. Distinguímoslu bien llueu, porque tien una cruz de bon tamañu.
        Dende esti sitiu yá vemos Vega Brañes, un mayáu guapu y con unes cuantes cabañes y bodegos pa curar el quesu.
        Equí, mirando pal oeste, vemos el vértice xeodéxicu del Tiedu. Una vez arriba y disfrutando de vistes impresionantes, vese cerca un picu con una cruz. Taba convencíu de que yera Peña Blanca. Ello ye que baxé del Tiedu y subí a lo que camentaba que yera Peña Blanca. N’efectu, hai una cruz y un buzón con un lletreru que pon Cabeza Ubena. Estrañóme un poco, pero ólvidóseme enseguidina viendo lo que los mios güeyos imaxinaren (yá tuviere nel Turbina): al norte tola costa dende’l cabu Llastres hasta  Cantabria. Al oeste el valle d’Ardisana, el Hibéu, el Mofrechu, el Sueve,… Al sur los tres macizos de los picos, col Urriellu siempre galanu. Al oeste el Turbina. Con estes vistes, que me ficieron tar ellí clisáu media hora o más, escaecí lo del nome y empecé a baxar cola satisfación que da patiar pel monte y llegar a un sitiu tan prestosu.
        Tovía me faltaba siguir disfrutando na baxada de la vista de los picos qu’agora quedábenme de frente y nun necesitaba mirar p’atrás como na subida.
        Amás, tuvi la suerte de qu’había una montonera d’utres y pudi  face-yos unes semeyes curioses (al mio paicer, eso sí).
        Tamién llama l’atención nel picu Tebrandi un peñascu, moldeáu pola erosión, que tien forma de muyer  que-y nomen “la señorona”.
        Lo único que tien feo esti camín ye que’l norte d’Asiegu ta atravesáu per tres llinies d’alta tensión que’estrocen bastante’l paisaxe.
        Préstame poner equí qu’hai montes n’Asturies que, si nun lo remediamos, vamos velos bien llueu atravesaos por estos xigantes colos que de xuru diba andar a la griesca don Quixote, Toi pensando, porque me queda cerca, en Peñamayor, que ye un cordal bien guapu y perconocíu por tolos que mos gusten los montes y pol que ta proyectao que pase una d’estes llinies. Hai bien de xente que  ta moviéndose pa evitalo y los amigos del monte creo que nun habíamos quedar paraos.
        A los dos o tres díes, cuando me punxi a devolver una tarxeta que recoyera del buzón de Cabeza Bubena, llamóme l’atención  lo que taba escrito. Ponía: “¿Peña Blanca?” Esti interrogante escamóme un poco y busqué más información. Total: nin los de la tarxeta nin yo tuviemos en Peña Blanca. En consecuencia: hai que volver. De xuru que valdrá la pena. (Tamién m’enteré que sí tuviemos nel techu de Llanes)

        Ruta del quesu y la sidra
        Porque na vida hai más coses que patiar y retratar nun se me pue escaecer falar  del puntu de partida: Asiegu.
        Asiegu ye ún de los pueblinos más guapos de Cabrales. Ye un mirador privilexáu del Urriellu, pero también tien otres coses.
        Esti conceyu ye conocíu en tol mundu pol so quesu  y tamién polos sos montes. Lo que nun sabe muncha xente ye que tamién saben facer una sidra que nun tien nada qu’envidiar a la de cualquier otru llugar d’Asturies.
        Ye precisamente nesti pueblu onde ta’l llagar Pamirandi. Manolo y Javier xunto a les sos muyeres, cocineres de postín, lleven un tiempo organizando una actividá perguapa que nomen “Ruta del quesu y la sidra” que paga la pena facer.
         Amás, podemos disfrutar nel so chigre d’unos tortos con picadiellu pa chupaselos deos, de cabritu o corderu xaldu, de boroños, d’albóndigues o d’otros manxares que va costamos olvidar. Pue dicise tamién que ye’l paraisu de los celiacos, pos tolos platos que preparen, incluyendo les llambiotaes, son aptos pa toos.

jueves, 1 de noviembre de 2012

Per Cabrales

            Martes, 23 d’ochobre de 2012

 

     Poncebos - Bulnes – Trenosa – Sotres  – Tielvi – Poncebos

     Un guapu, fácil  y entreteníu camín circular col que podemos disfrutar del impresionante paisaxe que ta presente en tolos requexos d’esti conceyu.