Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

domingo, 30 de diciembre de 2012

Patiando per Extremadura 2

        Llunes, 24 d'avientu de 2012       Pel Parque Natural de Cornalvo: Embalse de Cornalvo y Berrocal del Ruxideru. 
        
        Llegué al parque dende Mérida, pela carretera de Madrid. A unos diez kilómetros ta'l pueblu de Trujillanos y per una carreterina que pon embalse de Cornalvo, llégase al llau de la presa.
        A la salida del pueblu y principiu del parque natural hay un centru d'interpretación que yo nun visité porque, ente otres causes, a la hora que yo diba tovía taba peslláu.
        Como nun tuvi problema p'aparcar, taba solu, cambíé'l calzáu y de siguío empecé a caminar pela mandrecha la presa. Lo que fui topando, no que respeta a la flora, ta nes semeyes. Quedéme cola gana de retratar les grulles. Anque vi unes cuantes, nun pudi saca-yos nenguna semeya. Siempre taben más llistes que yo.
        Cornalvo tien 10.570 hectárees y ye Parque Natural dende 1988. Na xustificación a la declaración de parque natural dizse: -"La zona d'influencia del embalse de Cornalvo constituye ún de los ecosistemes más representativos y importantes de la Península Ibérica. Xunto a especies endémiques del propiu embalse, como´l xarabugu, conviven otres especies como la cigüeña negra, la grulla común o la llóndriga. Tamién hai una gran variedá florística así como un ecosistema de carbayos corcheros n'estáu natural de un valor ecolóxicu que nun se pue calcular".
        La presa romana de Cornalvo declaróse Monumentu Nacional en 1912. Tien forma de cuernu, unos cuatro kilómetros de llargo y diez de perímetru.
        Otra guapa patiada que prestóme enforma.

       


Patiando per Extremadura 1

        Domingu, 23 d'avientu de 2012     Nel entornu de Proserpina

        Toi avezáu a patiar per Asturies y de xuru que me presta muncho. Tol mundu, con razón, rellaciónamos con montes, subir, baxar, facer cume,...Pero hai otres caminates que tamién presten. Pueo dar fe d'ello.
        Tuviera bastantes veces n'Extremadura y había patiao kilómetrros pa baxo y p'arriba a la vera'l Guadiana. Estes Navidaes nun diba mui animáu porque nun m'apetecía repetir lo mesmo d'otres veces.
         Bien aconseyáu, fixi unes caminates perprestoses y quedóme la gana y los proyectos de munches más.
         El primer día anduvi alredor de Proserpina. Ye una presa d'orixe romanu asitiada a unos cinco kilómetros de Mérida. Pel branu ye un sitiu mui frecuentáu polos emeritenses. Pémeque nun m'enquivoco si digo que ye la playa d'esta ciudá.
         Cuando empecé la patiada, ocho y media la mañana, teníalo pa mi solu y pa dalgún q'otru aficionáu a la pesca. Unes hores más tarde  apaecieron dalgunos ciclistes y piragüistes.
         El paséu nun tien dificultá nenguna. Dexé'l coche na zona los chigres y empecé la patiada en dirección norte que ye la parte despoblada. Per esti llau hai terrén abondo pa caminar alloñándose daqué del pantanu. L'únicu problema yera que había cacería y nun me paicía mui aconseyable acercase. Dempués, casi siempre a la vera'l agua, completé un paseín d'unos catorce o quince kilómetros.
          Una bona esperiencia pal primer día y munches esperances pa los venideros.

jueves, 20 de diciembre de 2012

Ándara

        Miércoles, 27 de xunu de 2012        Finxu Escarandi - Vau de los Llobos - Vegues d'Ándara - Casetón d'Ándara - Finxu Escarandi

        Una guapa caminata pela fastera oriental de Los Picos qu'apenes conocía. Ye una patiada fácil si, como yo fixi, nun se sube a nengún picu.
        Amaneció caloroso, d'esos dies qu'amenacen tormenta. Nun son de los que más presten p'andar, pero... Nel aparcamientu  del Finxu Escarandi hai un cartel  qu'indica la sienda. Ta mui bien marcada y nun tien pérdiga. Empecé'l camín dirixéndome al vau de los Llobos.
        Entámase en baxada y con mayor o menor desnivel mantiense hasta'l vau. Pásase per un fayéu perguapu: Valdediezma. Hai unes bones vistes pal valle de Sobra y pa la sierra de Cocón. Na so lladera enseguida empieza a vese Tresviso. Dexamos a manzorga los mayaos de La Cerezal y La Llama. Travesamos otru fayéu y llegamos al vau de los Llobos. Equí hai una fonte onde se pue beber y reponer agua qu'en díes como esti consúmese abondo. Si siguimos descendiendo llegaríamos al pueblu cántabru de Beges.
        Hai que recuperar lo que se baxó y empezamos ehí mesmo con dirección al Casetón d'Ándara. Vamos pel fayéu La Llama y ensiguidina ganamos altura. Cuando s'acaba la viesca, siguimos subiendo teniendo siempre enfrente'l picu Macondíu. Son unos cuantos kilómetros d'ascensu que fixéronseme llargos, pémeque sobre too, pol calor.
        Al llau del picu, el camín bifórcase. De frente, pal casetón que ye lo señalizao y a la izquierda pa les vegues d'Ándara. El segundu camín ye'l que yo siguí. Dempués de vueltes y revueltes, siempre arrodiando'l Macondíu, llégase a la vega. Ta enlleno de torques y escombreres lo que fae que nun sea especialmente guapo.
        Ariméme a la fuente de la Escalera o de Odriozola. Tuvi ellí un  trechu reponiendo fuercies y l'agua que yá terminare. Nun foi mui llarga la parada porque amenazaba la nube y ye algo que nun me presta. Sobre too nel monte. Di la vuelta y, pel colláu Trasmacondíu, llegué al casetón d'Ándara. Sin parar, siguí al finxu Escarandi sin apenes moyame y eso qu'empezaben a cayer gotes.
        Presentéme n'Arenas antes que la truena, que nun foi tan gorda como n'Uviéu y Xixón, según me contaren dempués.
        Magar que m'asustó daqué la posible nube, como casi siempre, prestóme la caminata.

martes, 18 de diciembre de 2012

El Llosoriu

        Sábadu, 15 d'avientu de 2012          La Puente(Morcín) - La Figar - Colláu Pandu - Colláu Planu - Llosoriu - La Puente

        Hai munchos sitios per onde se pue subir a esti modestu picu. Yo escoyí La Puente (Morcín) porque  préstame muncho tol valle qu'asciende hasta'l Colláu Pandu.
        Pue dexase'l coche xunto al cementeriu. Hai una carreterina asfaltada que llega hasta'l pueblín de la Figar.Será un kilómetru y pue subise en coche. Onde acaba l'asfaltu ta la fonte Fiosa, con llavaderu.
        Dende equi, per una pista de formigón, vamos patiando ente praos, ablanares, castañales, carbayos y dalguna faya. Pasamos tres portielles y a la vera'l camín, la fonte La Fontica. Tol recorríu ye guapu enforma. Detrás vamos dexando'l Monsacru, a mandrecha la xerra Mantega y a manzorga'l Garcilleru.
        Yá, cerca'l colláu, echando una güeyada p'atrás, podemos ver el torrexón de Peñerudes. La primera vez que fixi esti camín, fae bien poco, paicíame imposible. La dirección sureste que llevamos, fae qu'ente La Madalena y la xerra'l Garcilleru, quede un resquiciu hacia'l noroeste que mos dexa velu. Presta o polo inesperao, prestóme a min.
         Nel colláu Pandu, divisoria de Mieres y Morcín, faese menos pindia la subida. Hai menos vexetación pero'l camín sigue siendo prestosu porque ahora acompáñamos la lladera oriental del Aramu a la derecha y el valle'l Caudal y los cordales orientales a la izquierda. Nos díes claros pue vese El Sueve, Peñamayor y los montes de Piloña, Ponga, Amieva y hasta'l Cornión.
        Siguimos dempués pela empinada  buelga que dexó'l gasoductu pa llegar a la cume del picu Canéu. Dende equí enseguida vemos el vértice xeodéxicu del Llosoriu. Cumeamos un poquiñín, una curtia baxada y l'ascensión última.
         Hai un vértice xeodésicu, un buzón y un entamu de galería minera que, polo que se ve, fixéronla pa poner un Belén. Nun soi mui partidiariu d'esta costume pero nesti casu préstame porque paez la maqueta d'una bocamina.
         El día nun taba como pa sentase a ver el paisaxe porque les ventolaes pémeque seríen de más de cien kilómetros per hora pero paga la pena les vistes: l'Aramu, El Monsacru, Uviéu, Xixón, les modestes xerres centrales, el cordal d'Urbiés y casi tolos montes del este y sur d'Asturies puen vese dende equí.
         Otra guapa patiada qu'espero nun tardar en repitir.

sábado, 15 de diciembre de 2012

Braña Cueiru y picu Altu La Casa

      Sábadu, 11 d'agostu de 2012         Puertu San Llorenzu - Collá la Tartulla - Braña Cueiru - Altu La Casa - Puertu San Llorenzu. 

        Una somedana, compañera de trabayu, fae tiempu que me dicía que-y paicía raro que diendo tantu pelos montes nun conociera La Braña Cueiru. Tenía razón, porque ye un sitiu perguapu, que ta cerca y ye fácil de patiar.
        Pémeque yá comenté n'otra entrada qu'esti añu propúnxime conocer estos llugares. Toi nello y ún foi esti. Conozo y caleyé varies veces pel camín de la Mesa dende San Llorenzu a Torrestío. Tamién fuere dende esti puertu a La Bustariega pero nunca me desvié pa Cueiru. Nin siquiera m'asomé, eso que dende La Cuendia La Celá, pasu común, sería un momentu.
        Cuando preparé la caminata yera cola intención de  dir a la braña Cueiru, subir al picu la Berza y volver. Fícilo a medies, porque de camín vi un pequeñu picu que nin siquiera sabía de la so esistencia y dempués de disfrutar per Cueiru cambiélu pol que pensare. Queda pa la prósima vez, que de xuru va ser enseguida, porque prestóme muncho y eso qu'l día borrosu y de calor nun foi de lo meyor. A les semeyes nun-yos gusta esta clase tiempu.
        El casu ye que salí del puertu San Llorenzu en dirección noreste, siguiendoel Camín de la Mesa. Pela lladera de la xerra la Verde, ente piornos y escobes, llégase a la collá la Tartulla o la Celá. El camín nun tien perda nin dificultá y los nuesos güeyos disfruten mirando pa la braña Orderias, el cordal del Cornón y la xerra del Paramu que mos queda a manzorga.
        Dende'l colláu, al oeste, vese'l guapu valle somedanu de Clavillas y pal este, les tierres de  Teberga. Siguiendo esta última dirección enseguida llegamos a la braña Cueiru. Ye'l  puntu d'unión de los conceyos de Somiéu, Balmonte, Teberga y Grau. A continuación tan les veigues de Taxa o´l Prau, Les Cancielles, Usil y Vicenturo que constituyen una de les estensiones de pastos más grandes y más guapes d'Asturies.
        Yá dixere que gustóme más el picu Altu La Casa que la Berza. Identifícome del too colo que diz Maurice Herzog y que pue lleese al principiu del blog. Cuando voi al monte la mio intención ye disfrutar y de xuru que a vegaes llógrolo subiendo al picu más altu pero la mayoría diendo o subiendo a onde m'apetez. Y esti foi'l casu.
        Dende'l Altu La Casa (1445m) hai unes guapes vistes pa tierres de Balmonte, Grau y Teberga y pa les xerres de Gradura, Sobia, l'Aramu, les Ubiñes,...
        Una prestosa patiada onde como casi siempre, influenciáu pola guapura d'alredor, paselo perbién.

jueves, 13 de diciembre de 2012

Ferreirúa

        Martes, 21 d'agostu de 2012   Puertu Ventana - Picu Ferreirúa

        Dende'l puertu Ventana empieza a caminase en dirección oeste per un senderu bien marcáu. Cresteando ente Asturies y Lleón y en constante pero llevadera subida, alcanzamos la cume que tamos viendo dende qu'entama la patiada.
        Ye difícil nun dir echando güeyades pa tras porque les vistes pa les Ubiñes son estraordinaries, pero como lo previsto ye volver pel mesmu sitiu, tiempu habrá pa disfrutar.
         Mentanto vamos viendo a mandrecha los valles de Teberga colos impresionantes fayeos, la Sobia, los Puertos de Marabiu, Cueiru, el Caldoveiru,... A manzorga la siempre guapa Babia.
         De frente tenemos el cordal de La Mesa, Los Vígaros, los Albos, el Morrunegru lleonés,...Tolo que más tardi veremos con más aposentu dende la cume.
         Anque tamos avezaos a creyer qu'l picu que tamos viendo va ser la parte cimera de la nuesa caminata, nesta xerra paecióme qu'esto s'esaxera. Pémeque tien la culpa tar viendo la cume casi dende'l principiu. Antes de llegar tenemos que coronar un tras otru'l picu'l Cuevu, les L.lombes y les Corones.Taba convencíu de qu'esta ultima yera'l final, pero...tovía falta un bon trechu.
         Dicía a lo primero que ye llevadera l'ascensión. Ye verdá, pero al menos a min, nun me paez nada cómodu'l pedreru final. Punxi munchu procuru pa pasalu y dábame sensación de refugu'l tener que volver pel mesmu sitiu. Pémeque ye daqué peligroso sobre too si ta moyao. (A lo meyor ye la mio vieyera).
         Na cume, yá dixi lo muncho y guapo que vemos. Paga la pena l.legar.
       
         

martes, 11 de diciembre de 2012

Les Casuques - Fariu - Cuatro Xueces

        Domingu, 9 d'avientu de 2012      Les Casuques - Ilesia vieya de la Collá - Ceñal - El Pevidal - Fariu - Cuatro Xueces (Dir y Venir).

       Ye raro que a lo llargo'l añu nun vaya dos o tres veces al Fariu y Cuatro Xueces. Ye una patiada guapa y si se tien suerte col clima siempre paga la pena. Amás, según el tiempu que se tenga, pue facese un paseín de seis o siete kilómetros dende'l altu Fumarea o una caminata de cerca venti si dexamos el coche en Vega Sariegu y travesamos la xerra La Llomba. Hai munches más posibilidaes. Estes suelen ser  les que yo faigo.

        Por embargu, la patiada del domingu, diba más de diez años que nun la facía y prestóme. Ye'l  P.R. AS - 161 col añadíu de unos cuatro kilómetros primero a les mines y  a lo último a la peña Cuatro Xueces.
        A tolo que se disfruta coles vistes qu'hai dende'l cordal del Fariu hai que axunta-y lo que topamos dende Les Casuques al picu.
        Merez la pena patiar pela pequeña viesca que topamos al poco empezar el camín. Nun mos deceiciona deviamos unos cientos de metros de la sienda pa ver los restos de les mines de fluorita. Y, por supuestu, hai que conocer los restos de la ilesia vieya de la Collá y el texu de más de quinientos años que tien a la vera.
        En resume un paséu peraconseyable.
       
        (Pa llegar a Les Casuques pue dise pela carretera de La Pola a Xixón y poco dempués del altu Muncó hai una desviación a mandrecha que pon Ordiales. Menos d'un kilómetro y tamos nel iniciu la sienda.)
  

lunes, 10 de diciembre de 2012

Grandamiana

        Domingu, 2 y xueves 6 d'avientu de 2012    Primer día: Área recreativa de Buyera - Villanueva - Castañéu'l Monte - Grandamiana - Llinares - Sograndio - Proaza - Buyera.
        Segundu día: Área recreativa de Buyera - Proaza - Llinares - Grandamiana - Castañéu'l Monte - Villanueva - Buyera.
        Domingu 2: La mio intención yera subir al techu Santu Adrianu pisando'l menos asfaltu posible y acabé patiando unos catorce kilómetros de carretera.
        Salí del aparcamientu de Buyera y per un guapu camín que sal de Villanueva subí a Castañéu'l Monte. Dende esti vistosu pueblu siguí pela carretera que va a Llinares. Poco antes de llegar, per un camín a mandrecha, llégase sin dificultá al picu Grandamiana. Paga la pena parase un bon trechu mirando pa los cuatro puntos cardinales: Uviéu y los cuetos que lu arrodien, La Llomba , Peñamayor, La Mostayal, L'Aramu, el valle'l Trubia, Les Ubiñes, Peña Rueda, La xerra Caranga, La Sobia, cordal de la Mesa, Marabiu, Yernes y Tamiza, Grau...Ye difícil ver tantu dende un picu de 813 metros d'altor.
        Hasta equí too mui bien. La mio intención yera baxar dende Llinares pe'l camín antiguu que tenía entendío qu'había a Proaza. Nun tuvi suerte al entrugar nel pueblu a una muyer con mui bona voluntá pero pocu conocimientu xeográficu de la so zona. Coles sos indicaciones acabé patiando nueve kilómetros de carretera que, pasando por Sograndio, lleven al valle del Trubia un trechu p'arriba Proaza. 
        Esti despiste y que nun llevaba la cámara pa facer semeyes decidióme a volver a facer la caminata.
 
        Xueves 6: Dende'l aparcamientu de Buyera fui hasta Proaza. Nos alredores de la torre de los Vázquez Prada, per un camín que sal con direción noroeste subí a Llinares. Ye una sienda prestosa que crucia una viesca bien guapa. Paezse bastante a la que llueu hai que recorrer de Castañéu'l Monte a Villanueva. Dende Llinares al picu Grandamiana, onde volví a gociar de too lo que se ve dende ellí. Dempués baxé pel mesmu camín pel qu'había subío'l día anterior.
        Esti segundu paséu prestóme muncho más que'l de la primera vez. Pémeque ye una ruta perguapa y recomendable. Amás diome pistes pa patiaes futures per esta fastera de la xerra Buanga o Guanga. El tabayón que lleva'l nome de la xerra y el picu Plantón ye'l siguiente oxetivu per esti territoriu.

miércoles, 5 de diciembre de 2012

El Remediu y Sariegu



Sábadu, 1 d’avientu de 2012            
El Remediu (Villamartín d’Arriba), riega l’Inguilu, Ñora, La Carcavá, Vega, Santianes, La Piñuca, L’Abarcón, Villamartín d’Arriba.


          El Remediu ye un pueblu de Nava. Nun ye ún cualquiera, ye’l mio pueblu. Préstame y paezme guapu. ¿Qué voi dicir d'él? Ye difícil ser oxetivu.
          Da gustu patiar les caleyes que conoces dende pequeñu. Emocióname pasar xunto a Les Peñes de'El Rebollalín, que yeren el monte pa min cuando tenía pocos años, y alcordame cuando de guah.es, díbamos a elles de merienda.
          Por embargu enfádame mirar pal Sur dende El Cutu y, que torres y cables d’alta tensión, casi tapen la vista d’El Cordal y Peñamayor. (Desaxero un pocu).
          Per Sariegu caleyaba con frecuencia fae años y tamién me presta recordalo. Cuantayá que ficieron la ruta la toponimia que ye perinteresante. Agora punxeron un lletreru en tolos caminos y caleyes que paezme orixinal.

          Salí de Villamartín d’Arriba con dirección norte siguiendo’l tramu, pa min más guapu, del Pr AS-148. Dempués, pela riega L’Inguilu, empobinéme a Sariegu, pasando per La Nozalea, Ñora, Moral, La Carcavá, el Pozu Saláu, Vega, Santianes, La Piñuca pa volver otra vuelta a El Remediu subiendo per una viesca perguapa que me dexó nel Pr As-148. Pasé per L’Abarcón (Los Andaluces) y caminé viendo a mandrecha El Remediu y a Manzorga Sariegu.

          Nos díes bonos, pue vese pal norte el cordal de La Llomba, pal oeste L’Aramo y pueblos de Sieru: Collao y Lieres; pal sur también Lieres, El Cordal, la sierra Peñamayor y de Qués y pal este dalgunos picos de Ponga y el macizu de’l Cornión.
          Ye un guapu recorríu qu’almite mil variantes.