Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

jueves, 20 de junio de 2013

Picu Oroxu y Les Praeres pel Peranchu

          Vienres, 14 de xunu de 2013          Pra - El Peranchu - Bobia -Trayida d'agua de Xixón - Xerrina Oroxu - Peña Oroxu - Colláu Melendreros - Les Praeres - Pra.

 "Montañeru nun ye solamente'l que vence'l monte. Tamién lo ye, y mui relevante, el que la siente, la almira y la contempla". José Ramón Lueje

          Esti ye otru de los paseos qu'entamo en Pra. Yá dixi dalguna vez que ye pa min ún de los sitios que más utilicé na mio vida d'andarín.
          La primera parte d'esta excursión trescurre pel P. R. As-198 "Ruta de la ribera del río Peña". Dexámosla cuando apaez la señal d'ultimu molín. Aquí siguimos de frente y empezamos a subir con direción a la central llétrica d'El Peranchu.
          A manzorga d'esti edificiu y con direición sur agarramos un camín bien pindiu, nesta época a cachos embarráu y en munches ocasiones tapáu per maleza y árboles cayíos. Too esto fae daqué difícil la marcha.
          Yá en Bobia, un mayáu bastante abandonáu, atopamos un tramu de camín nuevu o arregláu. Ensiguida tenemos que dexalu porque va con direición oeste y lo que queremos ye dir a la xerrina Oroxu que ta'l sur. Fai poco que a vegaes vemos la Caseta'l Guardia que ye'l nome que-y damos a la peña Oroxu.
          A veces pela trayida d'agua y otres pente escayos y cotoyes subimos a esti guapu cordalín dende onde vemos la cara oeste de Peñamayor, la peña l'Home, les praderíes de Campagüés, Peña Mea, El valle de Melendreros,...
          Pela cumbrera y caminando pal este llegamos al picu Oroxu que, anque modestu n'altor, ye un afayadizu mirador. Pal norte y de este a oeste vemos casi tol valle central d'Asturies: parte de Piloña, Cabranes, Nava, Sariegu, Sieru, Uviéu,...Pal este La Múa, Casielles, El Sueve, Vízcares, El Corníon,...Y a los nuesos pies Les Praeres a la solombra La Varallonga. Al Sur, casi al llau, Peñamayor.
          Yá por pista quédamos baxar a Les Praeres y dempués a Pra. La verdá ye que esta parte del recorríu ye la que menos me gusta. Nun ye fácil que seya too igual de guapo.
          En tou casu foi una guapa escursión.

2 comentarios:

  1. Esi recorriu fícelu yo muy parecíu va una temporada, pero desde Prá, yo xubí por Campanal. Mestite en ganes de dir a ver como ye la xuida per ehí, que desde Pereanchu, nun lo conozco.
    Un saludu

    ResponderEliminar
  2. Per Campanal suelo facelo yo dos o tres veces al añu Ye un camín que me presta a esgaya y dalguna vez siguí de les Praeres a les foces del Pendón pa volver a Pra per Bocarral.Precisamente tengo una entrada nel blog del 18 de payares de 2012 que titulo "Alredor de Peñamayor".
    Esti paséu ye munchu más curtiu anque hai que salvar el desnivel en pocu tiempu y amás el camín a lo primero ta bastante malu.La última parte p'acortalo ye pente escayos y cotoyes.
    Pue allargase siguiendo per un camín qu'arreglaron pienso que daquién de Bimenes porque va n'esa direición. Con más tiempu yo diria per él. Coincidiría l'últimu tramu col que yo suelo facer otres veces y que ta na entrada que nomé.

    ResponderEliminar