Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

viernes, 20 de diciembre de 2013

Pela xerra El Sueve.

          Vienres, 29 de payares de 2013         Pie de Potro (Casa Julia) - Picu Babú o Foyos - Picu Sellón - Picu Pienzu - Llanada de Bustacu - La Viescona - Pie de Potro (Casa Julia).

          "La cima d'un monte convirtióse nel sitiu onde poner los símbolos de cualquier relixón. Pero yo pienso que los montes nun tán fechos pa eso."
Reinhold Messner

          Dos veces fixere'l camín dende L'altu La Llama hasta'l Pienzu. Nun sé en cuantes ocasiones pasare les mañanes de sábados o domingos patiando al picu de la cruzona dende'l Fitu. Nos díes despexaos esta modesta xerra ye un miradoriu perguapu de la costa y de los montes d'Asturies. Amás ye bastante fácil atopase con rebaños de gamos que siempre presta.
           Tenía pendiente xubir pela Viescona y igüé esti fallu l'añu pasáu saliendo dende Casa Julia. Volví pel mesmu camín y prestárame.
          Al dia siguiente antes d'entamar otra escursión, Les Casuques - Fariu - Cuatro Xueces, formateé la tarxeta la cámara sin dame cuenta que nun descargare les semeyes. Diome rabia porque pasáralo bien y amás paicíame que podía facer una entrada prestosa pal blog. Entós propúnxime remedialo ensín dexar pasar munchu tiempu.
          Como "me lleva más el güeyu que'l botiellu" pasó casi un añu y nun m'arrepiento porque fixi un percorríu, a mio mou de ver, munchu más guapu.
          Empecé a caminar nel mesmu sitiu pero en llugar de dir pel fayéu La Viescona crucié'l regatu La Toya y pelos Tucones, lladera norte de la xerra, a veces per senderos y n'otres ocasiones pente cotoyes, berices y piedres, sin camín definíu, pero per una parea pindia enforma hasta llegar al colláu la Covaniella.
          Dende equí yá se camina meyor y per senderos con bastante cuesta, cumeando, hasta llegar al picu Babú. Si la borrina mos dexa, el restu'l percorríu ye bastante intuitivu y prestosu d'andar. Pasamos pel Sellón y el Duernes y dende equí vemos l'últimu picu: el Pienzu. Baxar, subir y desiguío tamos na cruzona que na mio humilde opinión estroza'l paisaxe. Pero esta ye otra hestoria que se m'escapa y nin tan siquiera toi seguru de llevar razón porque lo mesmo opínolo de munchos otros montes "adornaos" con toa clase de "xuguetes".
          La vuelta pel colláu Beluenzu, les cabañes de Margullines y  pela tantes veces patiada llanada de Bustacu ye entretenida y más relaxada porque yá perdiera'l mieu al borrín qu'amenazó tol día.
          Dempués a gociar baxando pela Viescona ente fayes bien grandes y poniendo procuru pa nun resbariar y pegase un xostrazu.
           Foi un día perguapu, anque pela medrana al borrín, en dalgunos momentos un pocu inquietante.
           La prósima vez tócame dir pel Altu La Llama. Tengo bon recuerdu y yá fai unos años que nun fixi esi camín.

6 comentarios:

  1. Arturo prestome esgalla ver el to reportaxe, va tiempu que nun voi al Sueve asina que me disti una gran idea pa esti domingu. Un abrazu y feliz navidá

    ResponderEliminar
  2. Acabo descubrir esti blogue, Mui guapu. Yá tienes un siguidor más.

    ResponderEliminar
  3. Hola Arturo, esta nunca la fice, así que apuntola. El Sueve ye mi segundu paraisu, pero lo que tengo mas triyao ye pal otru llau. Muy guapes les semeyes. Un abrazu y felices fiestes.

    ResponderEliminar
  4. A min el Sueve siempre me presta y esti camín pa subir al Pienzu, que ye la primera vez que lu fixere, gustóme muncho.
    Anónimo, ¡gracies! y felices fiestes pa to@s.

    ResponderEliminar
  5. Igualmente y gracies Juan Carlos Gutiérrez López.
    Un saludu.

    ResponderEliminar