Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 22 de julio de 2015

Per Nava: Xuntando PR AS 198, PR AS 67 y SL 8

         Xueves, 2 d'abril de 2015          La Era (Piloñeta) - Cauvilla (Piloñeta) - Grátila - Campanal - PR AS 67- Traveséu - Capiella Santu Tomás - La Puente (Priandi) - Les Tercies (Priandi) - La Pontona - Capiella Santu Tomás - Pista a l'Artosa - Campanal (pel PR AS 67) - Pista a Grátila - PR AS 198 - La Cipresa - Les Mesties - Pra - Pista a Les Praeres - Vocarral - Pista al Mayáu Pastor (pel PR AS 45) - Fuensanta - Fonte La Vegona - La Ferrería (pel  SL 8)- Ovín - La Ibesa - San Antonio (Piloñeta) - La Secá (Piloñeta) - La Era (Piloñeta).

                    "Apriende de quien yá caminó pellí: por más que te consideres únicu, siempre va haber daquién que tuvo'l mesmu suañu primero que tú y dexó marques que te pueden facilitar el percorríu, cañes quebraes pa facilitar la marcha. La caminada ye de to, la responsabilidá tamién, pero nun escaezas que la esperiencia ayena ayuda enforma." Anónimo

          Distancia: 17,9 km
          Circular: Sí
          Desnivel acumuláu subiendo: 736 m
          Altitú máxima: 565 m
          Desnivel acumuláu baxando: 736 m
          Altitú mínima: 232 m

          Prestosu percorríu que xunta los PR que diz el títulu. L'únicu que se fae enteru ye'l PR AS-198 (Ruta de la ribera del río Peña) pero ta de lo más guapo del AS-67 (Ruta de Sto. Tomás de Priandi. Falta'l pasu per La Castañal). Tamién s'anda un pocu del AS-45 (Foces del Pendón). Tando en forma y disponiendo de tiempu podría añadise-y esti PR y sería una escursión de lo más guapo. Seríen 26 kilómetros pa gociala. Espero facela en breve. Pa rematar acábase per parte del senderu local que pasa pel palaciu La Ferrería.
          Caminada perguapa y pémeque aconseyable pa toles que-yos gusten la nuesa etnografía y los nuesos paisaxes.
          Al mio mou de ver ye una prestosa y completa escursión. Nuna distancia nin curtia nin llarga disfrutamos del paisaxe: perguapes viesques, praos, ríos, senderos y caleyes; arquiteutura tradicional: capiella de Santu Tomás de Priandi, palaciu de La Ferrería y capiella de San Antonio  Piloñeta; canalizaciones y restos d'antiguos molinos d'agua; horros, paneres y cases antigües; tramos de sube y baxa n'abondo pa que los nuesos músculos trabayen...
          El PR AS 198 faese completu. Al PR AS 67 falta-y un bon tramu dende la Pontona a la pista l'Artosa (Nun se pasa pel guapu pueblu yerbatu de La Castañal). A cambiu patiamos pela fermosa viesca per onde trescurre'l senderu que va de Santu Tomás a La Pontona.
          Del PR AS 45 solo se percorrre una parte de la pista que baxa del Mayáu Pastor a Fuensanta.
          Caminamos pel SL 8 al so pasu per delantre'l palaciu La Ferrrería y el camín que sube a Ovín.
          El tramu de Traveséu a la capiella Santu Tomás (nel PR AS 67) ta tapándose. Nun tien perda pero en dalgunos sitios la maleza fae difícil el pasu. Esperemos que daquién tome les medíes oportunes pa que nun se pierdan estos guapos caminos.
          Nava y los conceyos axacentes tienen milenta posibilidaes pa los que-yos guste caminar pela naturaleza. Mantener en bon estáu los PR qu'esisten y señalar dalgún nuevu podría ser un oxetivu del nuevu gobiernu municipal. De xuru que munchos navetos y otros aficionaos al senderismu y a la montaña prestaría-yos abondo.