Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

lunes, 17 de agosto de 2015

Nos contornos de Peñamayor: Picos Varallonga, Redondu y Oroxu

          Sábadu, 2 de mayu de 2015          La Era (Piloñeta) - La Fuente (Piloñeta) - Pra - La Revueltona (Camín d'El Valle) - Porciles - Les Alcantarielles - Canal - La Varallonga - Les Praeres - Picu Redondu - LLames LLagar - Picu Oroxu - Bobia - El Peranchu - PR AS 198 (Ruta de la Ribera del ríu Peña) - Pra - La Fuente (Piloñeta) - La Era (Piloñeta).

          "Un montañeru ye o tiende a ser firme, silenciosu, conteníu; suel amar el compañerismu pero ye capaz de gociar de la soledá. Vive cerca d'una realidá primordial, del univesu nel so estáu más guapu y puru. Ye disciplináu, y sabe arrenunciar a casi tou p'algamar la so meta.
          Ye capaz de sacrificase, y sabe que l'home, magar la so brillantez, ye solo un puntu na inmensidá y ante la eternidá." Gaston Rebuffat

          Distancia: 14 km
          Finaliza nel puntu de partida (circular): Sí
          Desnivel acumuláu subiendo: 989 m
          Altitú máxima: 934 m
          Desnivel acumuláu baxando: 989 m
          Altitú mínima: 247 m

          Nun voi cansame dicilo: andar per Peñamayor y los sos contornos ye garantía de gociala.
          Esta cenciella y prestosa escursionina tien tolos componentes pa facer un guapu paseín pel monte:  dalgún cachín de pista (quiciabes más de la cuenta), cuestes, canales. peñascos, mayaos, viesques, ríos, regatos, bones vistes...
          Ye posible que lo menos guapo del percorríu, pelo menos pa los que patiamos muncho pellí, seya'l camín dende Piloñeta hasta la guapa canal pela que subimos a La Varallonga. De toes formes ye un paséu que pon a disposición de los güeyos del caminante una de les fasteres más guapes de Nava: La Puente Arriba. Pueblinos como Piloñeta, Grátila, La Curtia, Basoréu, Cezosu, La Capitana, La Viña, Ovín, Buyeres, ... son vistes que de xuru presten.
          Dalgo que me gusta y que vuelvo a facer milenta veces ye subir a la Varallonga per  una guapa canal antes de Piedranidia. Nesta ocasión entamela unos cien metros más abaxo.
          Díxilo munches veces y repítolo agora que les vistes dende esti pequeñu picu son inmeyorables: a la so solombra Les Praeres, cerquina el picu Redondu y l'Oroxu, el mayáu de Llames LLagar, el colláu La Campa, tola xerra Peñamayor, la Múa, la Xamoca, el Facéu y otros montes de Piloña, d'Amieva, Ponga,...Al norte dende'l Sueve a Uviéu pueblinos de Piloña, Cabranes, Sariegu, Sieru, Noreña, Uviéu,...Peña Careses y el cordal de la LLomba,...Casi al llau toles aldees de La Puente Arriba, el palaciu La Ferrería, la guapa villa de Nava., ¿Pue pidise más?
            Presta baxar a Les Praeres y cruciales de norte a sur pa subir al Redondu per dalgún de los senderos que va faciendo'l ganáu pa tener otra vegada más unes prestoses vistes de tol entornu. Quiciabes esta subida seya lo más íncomodo del paséu pola maleza que tien, sobre too cotolles.
           Continuamos de siguío al mayáu de LLames LLagar y al colláu La Campa pa sin dificultá denguna subir al guapu miradoriu que ye'l Oroxu. Repetimos vistes añadiendo la lladera oeste del cordal de Peñamayor, peña Mea y parte del valle de Melendreros. La baxada per Bobia al Peranchu fixérala daqué caótica pero sin problema nengún.
          Dempués l'entreteníu paséu pela ruta de la ribera del ríu Peña ( PR AS-198).
          Una prestosa escursión...