Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

miércoles, 16 de septiembre de 2015

El Maoñu: Per un camín pocu recomendable

          Sábadu, 23 de mayu de 2015           La Pesanca - El Muñizón - Foz del Infiernu - Monte Argañal - Pandemules (Al llau) - Picu Maoñu - Traslafuente - Mayáu Cureñu - Valle La Estanquera - El Muñizón - La Pesanca.

           "Apriende de quien yá caminó pellí: por más que te consideres únicu, siempre va haber daquién que tuvo'l mesmu suañu primero que tú, y dexó marques que te puen facilitar el percorríu; llugares onde asitiar la cuerda, pisaes, cañes quebraes pa facilitar el pasu. La caminada ye de to, la responsabilidá tamién, pero nun escaezas que la esperiencia ayena ayuda enforma". De "Manual para escalar montañas".

          Distancia: 17,68 km
          Finaliza nel puntu de partida (circular): Sí
          Desnivel acumuláu subiendo: 1.071 m
          Altitú máxima: 1.463 m
          Desnivel acumuláu baxando: 1.071 m
          Altitú mínima: 380 m

          Merez la pena subir al Maoñu anque sea namái porque los nuesos güeyos puean gociar de les perguapes vistes qu’hai dende la so parte cimera: cerquina, pa un llau’l mayáu Treslafonte y pal otru’l Pandemules; fayeos en tol entornu; y  pel norte’l Vízcares, al fondu la xerra'l Sueve y otros montes de Parres; al este el Pierzu y tras él El Cornión; cerquina la Llambria y Campigüeños, asomando  peña Taranes, Tiatordos, la Carrasca, El Requexón,…; casi al algame la xerra’l Tren y la de Pandemules col so picu cimeru Los Tornos o Peña Crespa; Al oeste montes de Piloña como’l Facéu o'l guapu picu Castiellu que da solombra al non menos guapu pueblín de LLigüeria,…; a lo cabero’l cordal de Peñamayor,..
          Lo que quiciabes nun sea tan acertao ye dir pel camín qu’escoyí. Dexé atrás l’esvíu qu’hai a manzorga que lleva al valle La Estanquera, a Cureñu y Treslafonte per onde baxaré y siguí pela pista de la foz de Los Moñacos hasta la siguiente esviación. Ye un bon camín hasta que mos topamos con una portiella con candáu que cierra'l pasu y fai qu'haya que volver p'atrás pa encontrar un accesu al monte que, amás de desorientar, ye difícil d'andar ya inclusive haya qu'usar les manes en dalgunos llugares pa salir de riegues o subir per llugares bien pindios y moyaos. Una llástima porque'l guapu fayéu ye de los que paga la pena patiar. Al paicer la viesca l’Argañal ye un monte priváu o eso dicen dalgunos carteles.
          Pa rematar pémeque la decisión d’entrar nel monte pela izquieda’l camín foi una equivocación. Comprobé un pocu más tarde qu’hubiere sío meyor pela derecha.
          Nun animo a naide a siguir esti itinerariu.
          Quiciabes seya meyor subir pel valle La Estanquera, y dempués de pasar pel guapu mayáu de Cureñu y la sorprendente, pola so guapura, campera de Treslafonte entamar a subir los pindios 500 metros que mos dexen nel guapu mirdoriu que ye esti monte ponguetu. Dempués hai la posibilidá d'optar por volver pel mesmu sitiu o baxar al colláu Pandemules pa buscar un pasu pela xerra del mesmu nome pa dempués siguir pela guapa foz de Los Moñacos. Tamién hai la posibilidá de baxar pela xerra'l Tren a La Estanquera pero esti camín tengo sintío que nun ye fácil.
          Cuando baxaba pel guapu mayáu Cureñu empecé a sentir un ruíu que nun concordaba col apacible llugar. Nun tardé muncho en atopame con una escavadora trabayando pa facer una pista. Foi otra de les circunstancies que fixeren que'l día de monte nun fuere tolo guapo que suel ser.
          En resumíes cuentes esti paséu per tierres de Piloña, Casu y Ponga ye manifiestamente meyorable. De cuando en vez métese la caza. N'otra ocasión saldrá bien.

No hay comentarios:

Publicar un comentario