Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

jueves, 22 de octubre de 2015

De collada LLomena al Sen de los Mulos. Un prestosu paseín per Ponga que nun precisa de munchu esfuerciu.

     
            Sábadu, 4 de xunetu de 2015          Collada Llomena - Les Bedules - Biforcadera - Collada Granceno - Entecollaos - Collada Viances - Fonte Les Files - Porrón d'Ardimales - Valle Tolivia - Sen de Los Mulos. Vuelta pel mesmu camín.

           "El paisaxe camuda,  asina qu'aprovéchalo: claro qu'hai que tener un oxetivu na mente: llegar a lo alto. Pero a midida que vamos xubiendo, puen vese más coses, y nun cuesta nada parase de xemes en cuando y esfrutar un pocu del panorama d’alredor. A cada metru
 conquistáu, pues ver un pocu más lloñe; aprovecha eso pa descubrir coses de les qu'hasta agora nun te dieres cuenta."  De "Manual para escalar montañas".

          Distancia: 21,12 km
         Finaliza nel puntu de partida (circular): Sí
         Desnivel acumuláu subiendo: 629 m
         Altitú máxima: 1510 m
         Desnivel acumuláu baxando: 629 m
         Altitú mínima:  1002 m                   

          Por más que lo paeza, el curiosu nome de Sen de los Mulos,nun tien na que ver con esti animal que ye fíu de caballu y burra o de pollín y yegua. Según el diccionariu toponímicu de la montaña asturiana de Julio Concepción pue venir de la pallabra llatina “semitam” que significa senda o seu y que ye un senderu estrechu y peligrosu, más la pallabra también llatina “molam”, muela o mole rocosa. De mou que Sen de los Mulos nomaría un senderu o pasu estrechu que crucia una xerra.
          Anque Ponga ye un de los conceyos pelos que me presta caminar en cantidá y les caminates  per llugares como’l Pierzu, Ventaniella o paseos dende Les Bedules son relativamente frecuentes ésta solo ye la sesta entrada nel blog d'esti guapu requexu d'Asturies..
          Equí namái tengo recoyíes tres reseñes del añu pasáu col títulu de Ponga na seronda 1, Ponga na seronda 2 y Ponga na seronda 3. Y yá más antigües son El Pierzu y Peña Salón. Nun ye fácil recoyer toes les escursiones que faigo…
          Nos últimos años el mio coche yá “diba casi solu” pa Les Bedules y, por variar, apetecióme dexalu nesta ocasión na collada LLomena. Esti llugar tan visitáu antaño pa subir al Pierzu, una o dos veces al añu, teníalu abandonáu nos últimos tiempos y como'l percorríu programáu yera fácil pensé na allargalu daqué pa recorrer el guapu tramu hasta Les Bedules. Nun m’arrepentí.
          Nun calorosu día, como foi esti sábadu de xunetu, son d'agradecer los llargos tramos a la solombra que proporcionen les fayes qu'abonden en cantidá nestes guapes tierres ponguetes.
          Sin grandes desniveles cáminase  pasando per Les Bedules, perguapu miradoriu de los montes ponguetos y del Cornión; Biforcadera y  collada Granceno onde abandonamos la pista que sigue hacia l’Arcenoriu pa continuar pel P.R. AS-283 Granceno-Tolivia. Dende equí cambien daqué les condiciones climatolóxiques. Anque tovía hai guapes viesques peles que pasar yá tenemos menos vexetación que mos protexa del sol que a midida qu’avanza’l día va calentando más. Menos mal que col Sen de los Mulos yá a la vista aumenten los ánimos pa caminar y siguir gociando del guapu paisaxe que nun mos abandona en tou’l percorríu.
          De toes formes la cercanía del picu ye un pocu engañosa porque pa llegar a elli pel camín fácil, arrodiamos  casi llaneando tola parte occidental de la xerra hasta que nel Porrón d’Ardimales facemos un xiru de casi 180 grados pa adentramos nel guapu y espectacular valle de Tolivia.
           La verdá que la grandiosidá d’esti valle apreciase meyor dende la cume pero ye fácil y prestoso subir per elli hasta llegar a la cruz y buzón nel que culminamos la subida.
          Paga la pena la sudada qu’agarramos na parte final del ascensu: Peña Subes, continuación d’esta xerrra; el Pierzu, Carriá y Peña Salón; El Precornión y Cornión cola imponente Peñasanta; el Pozalón , Niajo, Ten y Pileñes;  los picos LLuengu, Zorru , Rasu, Recuencu,... y tola viesca Peloño.
          Antes, en Les Bedules, pasáramoslo perbien coles vistes de la LLambria, Tiatordos y Maciedóme. Volveremos a gociala a la vuelta.
          ¿Pue pidise más?

No hay comentarios:

Publicar un comentario