Va prestame poner equí dalgunes de les munches semeyes que faigo nes mios caminates. Nun pretendo describir rutes nin dar conseyos sobre'l meyor camín pa faceles. N'Internet hai abondo d'eses informaciones y lo único que diba conseguir ye confundir.
De toes formes toi abiertu a responder a les entrugues que faiga daquién interesáu en dalgún de los mios paseos.
Fadré una introducción de caúna de les rutes.

sábado, 13 de febrero de 2016

Pasiar per Somiéu ye facer un homenaxe a los nuesos sentíos: “Picos L.Labana, Albo Occidental y Albo Oriental.

          Martes, 21 de xunetu de 2015          La Farrapona - L.lagu Cueva - Los Pozos - Picu L.lábana - Picu Albo Occidental (Intentu, mieu y vuelta) - Picu Albo Occidental - Picu Albo Oriental - L.lagu Cerveriz - L.lagu Calabazosa o Negru - L.lagu Cueva - La Farrapona.

          "El paisaxe camuda,  asina qu'aprovéchalo: claro qu'hai que tener un oxetivu en mente: llegar a lo alto. Pero a midida que va xubiéndose, puen vese más coses, y nun cuesta nada parase de xemes en cuando y esfrutar un pocu del panorama alredor. A cada metru conquistáu, pues ver un pocu más lloñe; aprovecha eso pa descubrir coses de les qu'hasta agora nun te dieres cuenta. De “Manual para subir montañas”.

          Distancia: 15,92 km
          Finaliza nel puntu de salida (circular): Sí
          Subiendo: 1026 m
          Altitú max: 2109 m
          Baxando:1026 m
          Altitú min: 1610m

          Nun tien preciu'l gociu que produz asomase a contemplar el territoriu que va dende Val.le de L.lagu  a L.lagu de Val.le. Esti aparente traballingües forma  un paraxe de lo más guapo qu'atopamos n'Asturies. Nun día bonu, clísense los güeyos delantre tanta guapura.
          Prometiérame yá fae una bona temporada qu'una vez al añu tenía que dir a dalgún balcón onde gociar de tan estraordinariu panorama.
          Na mio opinión esta ye una de les escursiones más guapes que se puen facer per Asturies. L'espectáculu d’esti paisaxe produz un plasmu ensin comparanza.
          La subida a estos montes somedanos nun ye difícil. Nesta ocasión compliquéla yo  al tratar de facelo de manera distinta y eso enrevesa daqué'l percorríu.
          Dende'l picu L.lábana quixi subir pela cara norte del Abo Occidental. Fixéralo hai unos cuantos años y nun me paiciera complicáu. Por embargu nesta ocasión entróme medrana y volvíme pa subir pel camín que se fae davezu.
           Per esti llau,el este, nun hai dificultá pero ye más aconseyable, anque s'arrodie, subir pela parte sur, per onde yo baxé, pa siguir al Albu Oriental.
          La baxada pela canal que va casi direuta al l.lagu Cerveriz ye mui pindia con muncha piedra suelto. Hai qu'esaxerar les precauciones pa nun tener problemas. Otra solución ye volver pel camín de subida.
           D’una forma o otra, inclusive sin subir a nengún picu, ye una excursión que cualquiera que tenga la suerte de disfrutala dalguna vez, de xuru que repite.
           Nin que dicir tien que pa min, como cada añu, foi un de los meyores díes de monte de 2015.
           En sin dulda qu'en 2016 repetiré esti o otru percorríu paicíu. El casu ye volver a disfrutar d'esta impresionante panorámica.

Powered by Wikiloc

No hay comentarios:

Publicar un comentario